Mikel Urrutikoetxeak eta Jokin Altunak lau eta erdiko finala jokatuko dute gaur, Bilbon. Zaratamokoa da faborito garbia apustuetan, 100-60ri, eta Amezketakoak gustura hartu du egoera hori presioa gainetik kentzeko
Berria. Artistaren eskuak ez daude eginda torlojuak kentzeko. Pintzela erabiltzeko eginda daude, maratilarentzat baino gehiago. Baina makina bati aurre egin behar dionean, artearekin ez da aski. Mekanismoen oinarria logika da, eta horiek desmuntatzeko inspirazioa baino gehiago behar da. Eta hori da, hain zuzen, Jokin Altunak gaur duen erronka. Mikel Urrutikoetxea mekanismo ia perfektuari egin beharko dio aurre Bilbon, lau eta erdiko finalean, eta, horretarako, musen bisita jasotzeaz gain, sufritzeko prest ere egon beharko du, aurkariak ez duelako hutsik egingo.
