Hamahiru minutuan ehun pilotakada eskas gurutzatuta 11-1 aurreratu ziren, Lekeition, ezinean aritu ziren Larrazabal eta Rezustaren aurka.
Jose Javier Zabaletak sanferminetan izandako lesioarekin, oker, oso oker, ekin zioten Peñak eta etxarrendarrak faborito nagusien artean sartu ziren Mastersari, baina atzelaria osatu eta aitaren batean argitu dute bidea. Aste honetan jokatu dituzten bi partidak irabazita -nafarrak jokatutako bakarrak- play-offetarako sailkatzea lortu dute, oraindik zehazteke dagoen bikote baten aurka, eta Nafarroa Arenara begira oso kontuan hartzeko bikotea direla gogorarazi diete gainerako parte hartzaileei. Bestalde, atzo Larrazabal alegiarraren ordez aritu bazen ere, Artola-Rezusta bikotea aurrera egiteko aukerarik gabe geratu da, Ezkurdia-Albisurekin batera.
