Altuna III.ak irabazi egin dio Zabaletari, erakustaldia emanda, eta buruz buruko finalerdietarako sailkatu da. Partida osoan agindu du, eta ia ez du behartu mindutako eskua
Mina esku-huskako jokoari atxikia doakion madarikazio bat da. Ehun gramoko harri kozkorrari eskuarekin emateak min ematen du, eta pilotari guztiek maitasun-gorroto harremana dute oinazearekin. Minik gabe ez dago pilotarik, are gutxiago buruz buru, eta Jokin Altunak dilema horri bueltak ematen igaro ditu azken bi asteak. Orduak egin ditu esku ahurrari begira, pilotakada biziak berekin dakarren iltze zorrotza nola kamustu pentsatzen. Berak onartu du eskuetako babes diseinu ugari probatu dituela. Esparatrapu, esponja eta polimero ingeniaritza, mina saihesteko. Babesik onena, baina, ez da ahurrean itsasten. Eskuentzako botikarik onena partidan agintzea da, eta Altuna III.ak hori aurkitu zuen atzo Labriten. Perfekzioa laztandu zuen Jose Javier Zabaletaren aurka, eta merezita sailkatu zen buruz buruko finalerdietarako. Ondo bidean, Unai Laso izango du aurkari, hark etzi erabakiko baitu jokatuko duen ala ez.
Leer más | Guztia irakurri: https://www.berria.eus/paperekoa/1946/024/001/2022-05-08/perfekzioa-da-botikarik-onena.htm.
