Laudioko atzelaria gaur ariko da aurrenekoz profesionaletan, Eibarren (17:00, ETB1). 18 urte besterik ez du, eta bi urterako sinatu du Asperekin. «Ahalik eta gehien» ikasi nahi du.
Esana zioten, baina Arkaitz Eskuzari (Laudio, Araba, 2004) oso argi geratu zaio zein bereziak diren profesionaletan estreinakoa egin aurreko egunak. «Sutan izan dut sakelakoa. Elkarrizketa pila bat egin dut». Mesedea eskatu dio kazetariari: elkarrizketa gaztelaniaz egitea. «Hobeto moldatzen naiz. Agintzen dizut hurrengoa euskaraz egingo dugula».