Aretxabaletaren eskuko lesioak baliatuta, Artola-Mariezkurrenak euren lidergoa sendotu zuten Miribillan
Berria. Txapelketa hasi besterik egin ez den arren, lehiaketa guztiek dituzten bi aurpegiek topo egin zuten Bilbon eta elkar elikatu zuten, Artola-Mariezkurrena lidergoan sendotu eta Urrutikoetxea-Aretxabaletari zorteak iskin egin diela berretsiz. Jokatutako bi partidetan haizea alde zutela jokatzea tokatu zaie bi ilehoriei –atzo Aretxabaletak hasiera samarretik asko sufritu zuen eskuin eskuarekin– baina pilotakadaka uxatu dituzte, haien inguruan, batez ere atzelariarengan, izan zitezkeen zalantzak eta kontuan izan beharreko bikotea direla erakutsi dute. Fresko daude, elkarrekin ondo moldatzen dira eta kolpeari eusteko gai badira, ez dute inoren beldurrik izan behar lehiaketa honetan.
