Inork gutxik espero zuen Altuna noizbait buruz buruko txapeldun izango zenik, eta hala ere iaz merezita irabazi zuen txapela. Etzi ekingo dio berriz ere lehiari, Donostian, Irribarria lagunaren aurka: «Ez dut gezurrik esango, partida berezia da».
Berria. Atanoko aldagelan takoak jartzen ari da Jokin Altuna (Amezketa, Gipuzkoa, 1996), Andoni Ugalde alboan duela. Urte gogorra izaten ari da, eta neke pixka bat nabaritzen du, baina sasoiko iritsi da buruz burukora. Etzi Iker Irribarriaren aurka hasiko da final-laurdenetan, eta gustura gelditu da pilota aukeraketan. «Partida garrantzitsua da, iaz final-laurdenetan irabazteak konfiantza handia eman zidan».
Azken lau partidak galdu dituzu binaka, arduratzen al zaitu?
Beti da askoz hobea inertzia positibo batekin iristea, partida batzuk irabazita. Zalantza txiki hori hor dut, baina ez dut gaizki ikusi nire burua.
