Sekulako jokoa erakutsi gabe, urdinei nahikoa izan zitzaien huts gehiegi pilatu zituzten aurkariak baino sendoagoak izatea, Serie B-ko Binakako finala irabazteko. Ezer galtzeko ez zutela, gorriak 9-17tik 16-17ra pasatu ziren, baina huts ugari pilatu zituzten.
Iker Salaberria eta Andoni Gaskue dira Serie B-ko Binakako Txapelketako txapeldun berriak. Atzo arratsaldean, beteta zegoen Iruñeko Labrit pilotalekuan, 18-22 irabazi zieten inoiz amore eman ez zuten baina huts gehiegi pilatu zituzten Egiguren V.a-Bikuñari. Askotan gertatzen den bezalaxe, txapela janzteko lehia hau ez zen ikusgarria izan, tentsioa gailendu zen, baina azkenerako emozioa ere nabaria izan zen zaleen artean.
