Jokin Altunak Aimar Olaizolaren marka bat berdindu du, finalerdietarako zazpigarren aldiz jarraian sailkatuta. Hamabi urte badira azkenekoz enpresa bereko lau pilotari azken aurreko kanporaketara heldu zirenetik: Irujo, Barriola, Titin eta Gonzalez
Kaiolako azken bost txapelak jantzi dituzten azken bi pilotariek orain arte finalik jokatu ez, baina final laurdenetako bi multzoetako onenak izan direnak edukiko dituzte aurrean asteburuan. Statu quoak, nolabait, eutsi dio bere egoerari, baina Lau eta Erdiko arraro xamar honek ordena berri baten atarian jarri gaituela dirudi.
