«Gustuko tokian» daudela dio Altunak: hark eta Tolosak finala jokatuko dute igandean Bilbon Elordiri eta Zabaletari irabazten badiete. «Txapelketa biribila» egin dutela dio, eta argi utzi du inola ere ez litzatekeela porrota izango finaletik kanpo geratzea
Goiza da, eta jende gutxi dabil Amezketako Fernando Amezketarraren plazan (Gipuzkoa). Han azaldu da Jokin Altuna (Amezketa, 1996). Tolosan (Gipuzkoa) bizi da, baina laster itzuliko da jaioterrira. «Oso pozik nago; badut gogoa etxera itzultzeko». Lasai dabil: ile apaindegira joan, paseo bat eman, kafe bat hartu, gurasoei bisita egin… Arratsaldean berotuko du hauspoa: Beotibarren entrenatuko da.
