Partidako lehen erdia zinez gogorra jokatu zuten eraberritutako Labrit pilotalekuan, Lasok eta Arangurenek beraien bertsiorik onena aterata. Lehen atsedenaldi luzearen ostean, baina, 1-11 partziala ezarri zuten urdinek, bigarren garaipena eskuratzeko.
«Iruditzen zait azken bi partidatan bikote ona osatu dugula, sendoa, eta horrela jarraitu behar dugu», adierazi zuen Jose Javier Zabaletak, Binakako txapelketako bigarren puntua erreskadan batu ostean. Aipatu bikote sendoa, baina, partidaren bigarren zatian atera zuten Peio Etxeberriak eta Etxarrengo atzelariak, lehen erdian Lasok eta Arangurenek orain arteko bertsiorik onenarekin ezustean hartu baitzuten Aspeko bikotea.
