Lehen erdi luzean erritmoa ezartzeko gai izan zen Artola beste behin oso on batek eta Imaz sendo batek bideratuta izan zuten garaipena, 17-14 aurreratu zirenean. Baina lehendabizi lehiari eutsiz eta gero hautsiz, atzelari nafarrak erabaki zuen.
33 urte bete eta biharamunean, bere ibilbide oparoko Binakakoaren seigarren finalaren atarian da Jose Javier Zabaleta, oraingo honetan Peio Etxeberriaren laguntzaz. Aspeko nafarrek gaur bertan bota dezakete azken ate hori, beren enpresako kide Altuna eta Martijak Jaka-Mariezkurrenari irabazita; baina, edozer gertatuta ere, Nafarra Arenarako bidea oso egina utzi zuten atzo Labriten Artola eta Imazen aurka oso zail jarria zitzaien partida bat irauliz. Baikoko gipuzkoarrak 17-14 ere izan ziren aurretik, baina azkenean etxarrendarraren nagusitzaren aurrean amore eman behar izan zuten.
