Anoetarrari nahi eta espero baino gehiago luzatu zaio Binakako finaletik, eta txapeletik, baztertu zuen zuntz haustura; baina gaur kantxetara bueltan izango da, non eta Iruñean, San Fermin egunean, Jaka eta Altunaren arteko kaiolako finalaren aurretik. Baikorra izateko gaitasun handiarekin, Binakako kapitulua itxi, eta dagoeneko aurrera begira dago.
Hasteko, nola zaude? Bi astez atzeratu da zure itzulera, baina arriskurik ez hartzeko izango zela uste dut, ala?
Bai. Frontoian entrenamenduetan hasi nintzenean zuntz hausturaren inguru horretan gainkarga batzuk izan nituen, eta orduan, ekografoarekin begira aritu ginen. Esan zigun oraindik bi aste inguru geratu beharko genuela. Orain frontoiko entrenamenduetan sentsazio hobeak ditut, inguru hori askoz hobeto daukat, gainkarga hori kenduta.
